Breakbeat.is

Veggspjöldin í borginni - Opið bréf til borgarfulltrúa Reykjavíkur

22.02.2012

Eftirfarandi bréf var sent í tölvupósti á borgarfulltrúa Reykjavíkur þann 22. febrúar 2012: 

Veggspjöldin í borginni - Opið bréf til borgarfulltrúa Reykjavíkur

Á vordögum ársins 2008 var skorið upp herör gegn upphengingum veggspjalda í miðbæ Reykjavíkur. Veggir og kassar, sem í áraraðir höfðu borið uppi veggspjöld er auglýstu tónleika og aðra menningarviðburði, voru hreinsaðir svo til samstundis ef einhverjum tónleikahaldaranum eða menningarvitanum datt í hug að hengja þar upp plögg til kynningar á viðburðum sínum. Eftir þessa hreinsun hafa fáir lagt í að hengja upp veggspjöld utandyra í miðbænum utan þeirra örfáu en forlátu veggspjaldastanda við Ingólfstorg sem iðulega eru umsetnir.

Minnir bréfaritara að þetta framtak hafi verið hluti af einhvers konar hreinsunarherferð þáverandi miðborgarstjóra sem fólst m.a. í tiltekt á tómum lóðum og baráttu gegn veggjakroti. Nú er það góðra gjalda vert að halda borginni hreinni og fallegri en undirrituðum og mörgum öðrum finnst þó að veggspjöld ættu að eiga sinn sess í almannarými borgarinnar. Miðborgarstjórinn sjálfur tók meira að segja undir þetta sjónarmið árið 2008 þegar hann lofaði sérstökum veggspjaldarömpum og kallaði slíkt sjálfsagða og nauðsynlega aðstöðu (sjá 24 stundir, 12. júní 2008 http://www.mbl.is/greinasafn/grein/1221386).

Nokkrum vikum eða mánuðum síðar fóru vissulega upp veggspjaldarampar, ólögulegir steinsteypuklumpar sem staðsettir voru fjarri alfaraleið. Virðast ramparnir síðar hafa verið teknir úr umferð eða í það minnsta færðir enn fjær gangandi vegfarendum miðbæjarins, því bréfaritari hefur ekki rekist á þá nýlega í veggspjaldaupphengingagönguferðum sínum.

Góð aðstaða til upphenginga á veggspjöldum er Reykjavíkurborg mikilvæg. Öflug veggspjaldamenning er oftar en ekki vitnisburður um sterka grassrótarmenningu og líf í menningarkimum og jaðarsvæðum samfélagsins. Í lifandi borg má lesa dagskrá vikunnar af veggjunum. Auglýsingar í dagblöðum og sjónvarpi eru ekki á færi þeirra sem starfa utan meginstraumsins heldur eru veggspjöldin miðill þeirra. Þeir íslensku tónlistarmenn sem hafa náð hvað lengst á alþjóðamarkaði og við sem þjóð erum hvað stoltust af koma einmitt af jaðrinum og úr grasrótinni. Slík list og menning verður ekki til í ríkisstyrktum sölum Hörpunnar né vex hún upp úr markaðsdrifnu poppi sem höfðar til lægsta samnefnara heldur sprettur hún upp úr frjósömum jarðvegi grassrótarinnar.

Þá eru veggspjöldin oftar en ekki listaverk í sjálfu sér, á bakvið þau stendur hæfileikafólk, grafískir hönnuðir og listamenn, sem þróa fag sitt með veggspjaldagerð. Eru útfærslurnar margar hverjar fjölbreyttar og flottar og geta lífgað upp á grámyglulegan hversdagsleikann. Loks telur undirritaður að blómleg veggspjaldamenning hljóti að falla vel undir kjörorðin „Lesið í borg“ sem er einmitt yfirskrift starfsáætlunar Menningar- og ferðamálasviðs Reykjavíkur árið 2012.

Í þessu ljósi er herör borgarinnar gegn upphengingum veggspjalda í almannarými síðastliðin misseri sorgleg. Leitt er að ekki hafi verið staðið við loforð um að koma upp myndarlegum stöndum fyrir veggspjöld á fjölförnum leiðum miðborgarinnar. Í erlendum borgum má finna ótal dæmi um smekklegar útfærslur á slíku og mætti vafalítið leysa þetta mál svo úr yrði borgarprýði. Undirritaður vill því hvetja borgarfulltrúa til þess athuga vandlega möguleikann á því að koma upp einhvers konar stöndum og stuðla þannig að heilbrigðri miðlun mennigarviðburða.

Að lokum vill undirritaður nýta tækifærið og bjóða borgarfulltrúa og borgarbúa alla velkomna á sýninguna Taktabrot: Veggspjöld, flugumiðar og annað prentefni úr starfi Breakbeat.is sem stendur yfir í Artíma Gallerí, Smiðjustíg 10, dagana 24. febrúar til 4. mars. Þar má sjá brot af þeim fallegu og forvitnilegu veggspjöldum sem prýddu veggi borgarinnar á árum áður. Nánari upplýsingar um sýninguna má finna á bok.breakbeat.is

Ekkert er fegurra en veggspjöld í Reykjavík.

Með von um góðar undirtektir
-Karl Tryggvason
Tónleikahaldari, plötusnúður og íbúi miðbæjarins

Veggspjaldasýningin Taktabrot: Veggspjöld, flugumiðar og annað prentefni úr starfi Breakbeat.is 2000-2012 í Artíma Gallerí 24.02.-04.03.2012

19.02.2012

Í tilefni útgáfu bókarinnar Taktabrot: Veggspjöld, flugumiðar og annað prentefni úr starfi Breakbeat.is 2000-2012 verður efnt til veggspjaldasýningar undir sama nafni í samstarfi við Artíma Gallerí, Smiðjustíg 10, dagana 24. febrúar til 4. mars. Á sýningunni verður að finna brot af því besta úr veggspjaldasafni Breakbeat.is og hægt að sjá forsmekkinn af því sem koma skal í veggspjaldabókinni Taktabrot. Sýningastjórn er í höndum Karinu Hanney Marrero.

Sýningin opnar föstudaginn 24. febrúar kl 18:00, verða léttar veitingar í boði og taktabrotstónar frá plötusnúðum Breakbeat.is byggja upp stemninguna. Þá verður hægt að styrkja útgáfu bókarinnar og tryggja sér um leið eintak af henni við útgáfu og miða í veglegt útgáfuhóf. Aðgangur sýningunni er ókeypis, verður opnunartíminn auglýstur þegar nær dregur.

Staðsetning Artíma Gallerí

Hveitilímið - besti vinur veggspjaldsins

12.02.2012

Veggspjöld eru ein helsta auglýsingaleið grasrótarinnar en til þess að þau skili sínu þarf að hengja herlegheitin upp. Til þess þarf í fyrsta lagi veggspjald og vegg en einnig eitthvað til að hengja á vegginn með. Kennaratyggjó er ekki kúl og límband er fyrir amatöra, alvöru fólk notar lím og ódýrast er að notast við hveitilím. Í þágu grasrótarinnar birtir Breakbeat.is hér sína einstöku uppskrift af hveitilími:

Byltingakennt hveitilím Breakbeat.is:
1 hluti hveiti
3 hlutar vatn
salt og pipar eftir smekk  

Hveitilím í potti

Vatnið er sett í pott og hveitið sigtað til þess að ná úr því kekkjum. Þá er kveikt undir vatninu og hveitinu hrært rólega út í. Hrærið reglulega í á meðan blandan hitnar, innan skamms tekur blandan að þykkna og þegar farið er að bubbla í pottinum er kominn tími á að slökkva undir.

hveitilím í fötu 

Til þess að líma upp veggspjöldin þekur maður flötinn sem líma á upp á með líminu, leggur svo veggspjaldið þar ofan á og penslar loks þunnu lagi af lími ofan á veggspjaldið.

Hópfjármögnunin fer vel af stað

06.02.2012

Hópfjármögnun Breakbeat.is hefur farið frábærlega af stað, þegar þessi orð eru rituð eru liðnir rúmir 3 sólarhringar síðan vefurinn fór í loftið og hafa 28 aðilar styrkt verkefnið um 130.500 krónur samtals. Við þökkum öllum þessum 28 kærlega fyrir sitt framlag. Þá hafa ótal aðilar komið verkefninu á framfæri með einum eða öðrum hætti, kunnum við öllum sem hafa þannig lagt hönd á plóg einnig þakkir fyrir og biðjum ykkur jafnframt um halda áfram að linka á vefinn og myndbandið. 

Er ætlunin að birta hér á fréttahluta síðunar tilkynningar tengdar verkefninu og tengd efni ýmis konar. Mælum við með að líta reglulega hér inn.

Verkefninu ýtt úr vör

03.02.2012

Í dag hefst hópfjármögnunarverkefni Breakbeat.is. Hópfjármögnuninn mun standa út allan febrúar mánuð til og með 2. mars.